Pā tonu ai ētahi tikanga ki te Whare me ōna komiti. Karangahia ai ēnei ko Ngā Whakataunga Tū Roa me Ngā Whakatau a ngā Mana Whakawa. Ko te mahi a ngā tikanga he āta titiro kei te tika, kei te pai te whakaarohanga i raro i ō mātou hātepe pāremata i mua i te whakatakoto whakataunga oti atu.
Ngā tauira o ngā huarahi kei roto i ngā Whakataunga Tū Roa, ko
-
te pōtitanga Mana Whakawā
-
ngā wā hui o te Whare
-
ngā wā kauhau me te roa o ngā tautohenga
-
te rārangi o ngā take
-
te pupuri i te rongomau
-
te huarahi pōti
-
ngā mahi a te komiti whiriwhiri
-
te ara whakaaroaro pire (ture hukihuki)
-
te whakaae pūtea mā te marea
-
ngā pātai ki ngā Minita me ētahi atu mema
-
ngā take whakaruru
I ētahi wā, ka hiahiatia he tikanga e te Mana Whakawā mō tētahi take huarahi i te mea, kāore pea te tikanga ki tētahi tūāhua ake i mārama. Ka noho mai ētahi o ngā whakatau nei hei tauira whaipainga mō muri atu. Ka whakatikaina ngā whakatau nei, ā, ka whakaraupapatia ki roto i te pukapuka, Speakers’ Ruling, kia ngāwari noa ai te tiki atu.
He wā anō ka hiahiatia he tikanga tāpiri, ā, ka whakatakoto mōtini pea te Whare. He rite anō te mana o ngā mōtini nei ki tērā o tētahi Whakataunga Tūroa. He ‘whakataunga tū poto’ te ingoa o ngā mōtini nei.
Kei te Whare anō tōna mana ki te hanga tikanga mōna. Ka tata haere ana ki te mutunga o tētahi wāhanga pāremata, kua tūtohu pea te Komiti Whiriwhiri Take Whakataunga Tū Roa kia whakahōungia aua Whakataunga Tū Roa. Ka whakapūmautia pea ēnei e te Whare kia reri ai mō te wāhanga hōu.
